Talap bıik, mindet zor

Búginde «Ońtústik» óńirlik qolbasshylyǵynyń áskerleri elimizdiń Ońtústik aımaǵynyń áskerı qaýipsizdigin senimdi qam­tamasyz etetin jaýyngerlik ja­ǵynan jattyqqan jáne qalyp­tasqan organ bolyp tabylady. 7 mamyr – Otan qorǵaýshy kúni qarsańynda osy «Ońtústik» óńirlik qolbasshylyǵy ásker­leriniń qolbasshysy, general-maıor Talǵat QOIBAQOVPEN suhbattasýdyń sáti túsip, áske­rılerdiń jaýyngerlik rýhy men urysqa daıyndyq deńgeıi jaıly áńgimelesken edik. – Talǵat Mamyrtaıuly, áń­gimemizdi aldymen «Ońtústik» óńirlik qolbasshylyǵy ás­kerleriniń qurylý tarıhy kezeńinen bastasaq. – El tynyshtyǵyn kúzetip turǵan áskerı qyzmetkerlerdiń moınyndaǵy jaýapkershilik qashanda eren. Qazaqstan Qa­rýly Kúshteriniń dúnıege kelýi táýelsizdigimizdiń alǵashqy jyldaryndaǵy qıyn-qystaý kezeńmen tuspa-tus keldi. Eko­nomıkalyq qıyndyqtarmen qatar, el qaýipsizdigi úshin ás­ke­rı ekonomıkalyq máse­le­lerdi de sheshý kezek kúttir­mes mindet edi. Mynaý alma­ǵaıyp, mazasyz dúnıede jas mem­­leketimizdiń irgesin qym­tap, jeriniń tutastyǵyn saqtaý úshin Elbasymyz zamanaýı ásker qurýdy qolǵa aldy. 1992 jyl­dyń 7 mamyrynda Qazaqstan Res­pýblıkasynyń Qarýly Kúshteri quryldy. El Prezıdenti – Qarýly Kúsh­terdiń Joǵarǵy Bas qolbas­shysynyń tapsyrmasy boıynsha jas táýelsiz eldiń Qorǵanys mınıstrligi aldynda qysqa merzim ishinde utqyr, urysqa qabiletti armııa qurý mindeti turdy. Kóp uzamaı Shyǵys, Ońtústik, Batys jáne Ortalyq áskerı okrýgteri dúnıege keldi. Toqsanynshy jyldardyń aıaǵynda el Qarýly Kúshteriniń qurylymy reformalanyp, Qarýly Kúshterdiń úsh túri – Jalpy maqsattaǵy kúshter (burynǵy Qurlyq áskerleri), Áýe qorǵanysy kúshteri men Memlekettik shekarany qorǵaý kúshteri engizildi. Keıin Jalpy maqsattaǵy kúshter qaıtadan Qurlyq áskerleri bolyp ózger­tildi. 2003 jylǵy 7 mamyrdaǵy «Qazaqstan Respýblıkasy Qa­rýly Kúshteriniń qurylymyn odan ári jetildirý sharalary týraly» Jarlyqqa oraı, Qur­lyq áskerleriniń quramyna «Astana», «Ońtústik», «Batys» jáne «Shyǵys» óńirlik qolbas­shylyqtary, Áýe qorǵanys kúsh­teri men Áskerı-teńiz kúshteri kirdi. Eki derbes ásker tekteri – Aeroutqyr áskerleri – Joǵarǵy Bas qolbasshynyń rezervi, Raketa áskerleri men artıllerııa­sy quryldy. Osy Jarlyqpen Qarýly Kúshter Bas shtabynyń bazasynda jańa áskerı basqarý organy – Shtabtar bastyqtary komıteti quryldy. – Iá, aradaǵy 23 jylda ás­kerimiz qalyptasyp, aıaǵy­nan nyq turdy dep aıtýǵa ábden bolady. Áıtse de, jaýyn­ger­lerimiz barlyq jaǵdaıǵa saqadaı-saı ma? Áskerimizdiń bedeli men abyroıyn arttyrýda qandaı jaǵdaılar jasalýda? – Búginde Qarýly Kúshter­diń qyzmetinde jumyldyrý re­zerviniń daıyndyǵyna aıryqsha kóńil bólinip otyr. Qazirgi tańda bizdiń shaqyrý jáne daıyndyqtan ótkizý júıemiz tolyqtaı je­til­dirildi. Jeke quramdy jasaq­taý kelisimsharttaǵy áskerı qyzmetshilerdiń úlesine basym­dyq bere otyryp, aralas prınsıp boıynsha júzege asýda. Qarý­ly Kúshterdiń quramdas bir bó­ligi «Ońtústik» óńirlik qol­bas­shylyq áskerleri elimizdiń Ońtús­tik óńiriniń tutastyǵy men qaýipsizdigin saqtaýda qyraǵy kúzette tur. Oǵan elimizdiń Al­ma­ty, Jambyl, Ońtústik Qazaqstan jáne Qyzylorda syndy tórt oblysynyń 713 myń sharshy kı­lometrdi quraıtyn aýmaǵy jatady. 2001 jyly mamyr aıynda óńirlik qolbasshylyqtyń Taraz qalasynda ornalasqan basqarý shtaby ǵımaratynyń ashylýyna Qazaqstan Respýblıkasynyń Prezıdenti N.Nazarbaev qatysyp, okrýgke Jaýyngerlik tý tapsyrdy. Joǵarǵy Bas qolbasshy osynaý saltanatty sát ústinde «Qazaqstan Respýblıkasy Qarýly Kúshteriniń qaıta jańǵyrtylýy Ońtústik áskerı okrýginen bastalady», degen edi. Muny qorǵanys salasyndaǵy kórsetilgen qurmet retinde maqtanysh tutamyz. Búginde bizdiń memleketimizdiń basshylyǵy táýelsiz Qazaqstan armııasy kúshti jáne myqty bolyp qalyptasýy, sondaı-aq, áskerı kásibı bedeldi jáne abyroıly bolýy úshin barlyq jaǵdaılardy jasaýda. Jyl basynan beri «Ońtústik» óńirlik qolbasshylyǵynyń áskerlerinde jaýyngerlik daıyndyqpen qatar ásker qataryna shaqyrylýshy jastarmen kóptegen áskerı-patrıottyq aksııalar ótkizildi. Elimizdiń tól áskeriniń qýatyn arttyrý baǵytynda júrgizilip jatqan aýqymdy reforma­lar óńirlik qolbasshylyq ásker­lerinde de júzege asýda. Jaýyn­gerlik ázirlikti arttyrý úshin munda barlyq jaǵdaı jasal­ǵan. Oblys aýmaǵynda orna­lasqan, elimizdegi eń iri oqý-jattyǵý alańy bolyp tabylatyn Mátibulaq, sondaı-aq, Teris-Ashybulaq, Aısha bıbi, Múńke, Darbaza polıgondary ás­kerılerdiń biliktiligin shyń­daýda úlken ról atqaryp otyr. Elimizdiń Qarýly Kúshteri­niń áskerı qurylymdary tartylǵan «Saryarqa-2004», «Jetisý-2005», «Ile-2006», «Aldaspan-2008», «О́zara is-qımyl-2009», «Beıbit mıssııa-2010» syndy oqý-jattyǵýlar barysynda «Ońtústik» óńirlik qolbasshylyǵynyń áskerı bólimderi de joǵary jaýyngerlik daıyndyqta ekendikterin kórsete bildi. Bul jemisti joldar kúni búgin de jalǵasyp, osyndaı jattyǵýlar barysynda ózderin aldyńǵy shepten kórsete bilýde. – Áskerdiń mereke al­dyn­daǵy kóńil-kúıi qalaı? Qansha degenmen, bul mereke jaýyngerlerdiń rýhyn oıatyp, otansúıgishtik qasıetterin arttyrady emes pe? – Elbasynyń «Nurly Jol – bolashaqqa bastar jol» Joldaýyn negizge ala otyryp, qolbasshylyq jastardyń boı­yndaǵy otansúıgishtik qasıetti barynsha arttyryp, Otan ty­nysh­tyǵyn qorǵaý jolyndaǵy qyz­metterine laıyqty úles qosady. Bizdiń ortaq Otanymyz – Qazaqstannyń ósip-órkendeýi jolynda áskerıler de aıanyp qalmaıdy. Astanada óte­tin áskerı sherýge bizdiń áskerlerimiz qatysady. Onda «Ońtústik» óńir­lik qolbasshylyǵynyń ásker­leriniń úzdik ofıserleri, serjanttary jáne áskerı áıel qyzmetshileri Qurlyq ásker­leriniń sherýinde sap túzeıdi. Al, 9 mamyrda Otan qorǵaýshy kúni jáne Uly Otan soǵysyndaǵy Jeńis meıramyn Taraz garnızonynda Jambyl oblysy ákimdigimen birge bizdiń áskerı qyzmetshiler qatysqan merekelik sharalar ótedi. Bul sharalar bizdiń Qarýly Kúshterimizdiń abyroıyn arttyrýǵa jáne áskerlerdiń zamanaýı kásibı sheberligin tur­ǵyndarǵa shynaıy kórsetý múm­kindigi týady. Meıram kúnderi biz Uly Otan soǵysynyń arda­ger­lerin umytpaýymyz tıis. Olar ózderiniń jastaryna qara­mastan sarbazdar men áskerı qyzmetshilerdi batyrlyqqa jáne Otanymyzǵa abyroımen qyzmet etýge úıretedi. Áńgimelesken Oralhan DÁÝIT, «Egemen Qazaqstan». Jambyl oblysy.